أنا جمعت كل الأسئلة اللي سألتوهالي الفترة اللي فاتت بخصوص مبادرة البنك المركزي 🏦 بتأجيل أقساط القروض و بطاقات الإئتمان لمدة 6 شهور بدون غرامات تأخير ، هتلاقي هنا اجابات لكل الأسئلة إللي بتدور في دماغك 🥰
1️⃣ الأقساط و الفوايد هتتحسب إزاي ؟
القسط بالفوايد هيتأجلو لمدة 6 شهور ، بعد ال 6 شهور إنت مش بتدفع الأقساط مجمعة ❌ ولكن مدة القرض بتزيد فلو كان فاضلك سنة مثلا بقي فاضلك سنة و 6 شهور 👌
📌 بس خلي بالك إن ال 6 شهور إللي اتأجلو وإنت مش هتدفع فيهم هيعدو عليك فوايد 💸 فمثلا لو كان فاضل في مديونية قرضك 50,000 بعد ال 6 شهور المديونية دي هتزيد بقيمة فوايد ال 6 شهور اللي مدفعتش فيهم
📌 القيمة دي كام بالظبط ؟ دي كل بنك بيحسبها طبقا لسياساته وطريقة حسابه للفايدة.
دفع المديونية بتاعتك بفوايدها هيتأجلو لمدة 6 شهور مش هتدفع فيهم أي مبلغ للبنك 🏦 ولكن فترة ال 6 شهور هيعدو عليك فوايد 💸 فبعد الفترة دي مديونيتك هتبقي عبارة عن (مديونية كل شهر +الفايدة الشهرية ⬅️ مضروبين في ال 6 شهور) 💁♀️
ودي ⬆️ حسبة توضيحية ممكن تختلف من بنك للتاني حسب سياساته وطريقة حسابه للفايدة 👌
لو انت متعثر خلال الفترة دي بسبب أزمة كرونا 😷 ودخلك الشهري مش هيساعدك تسدد بالطريقة العادية يبقي المبادرة هتبقي هي الحل الأفضل ليك وأجل أقساطك 🙏
رأي سالي
أما لو متاح ليك إنك تسدد كل شهر ، الأفضل ليك إنك متأجلش لأن هيتحسب عليك فوايد انت في غني عنها 💜
2️⃣ القرار ده مين اللي يقدر يستفيد بيه ؟
القرار بيضم كل العملاء اللي واخدين تسهيلات ائتمانية يعني قروض💰أو بطاقات ائتمان 💳 ” أفراد أو شركات” سواء المنتظمين في السداد أو غير المنتظمين 🙏
3️⃣ أنواع القروض اللي داخله في المبادرة ؟
بطاقات الإئتمان ، القروض الشخصية ، قرض السيارة بهدف الاستخدام الشخصي والقروض العقارية للإسكان الشخصي كمان عملاء مبادرات البنك المركزي 🏦
⬅️ أي كان نوع الضمان اللي انت وأخد بيه القرض ، كل أنواع الضمانات بتشملها المبادرة 🥰
⬅️ خد بالك كمان ، ممكن تسمع من البنك بتاعك مصطلح زي القروض الاستهلاكية أو قروض التجزئة المصرفية : هي هي الأنواع إللي قولتلها لك ، اختلاف بس المسميات البنكية 💜
4️⃣ مين إللي مش مستفيد من المبادرة ؟
▪️عملاء المشاريع الصغيرة و متناهية الصغر في البنوك لاختلاف طبيعة الأقساط 💸
▪️عملاء المشاريع الصغيرة و متناهية الصغر من شركات التمويل زي ⬅️ تساهيل ، تنمية ، تمويلي ، ريفي .. وغيرهم وده لأنهم غير تابعين للبنك المركزي ولكن تابعين للهيئة العامة للرقابة المالية 👌
▪️العملاء اللي أخدو قروض و بطاقات ائتمان بعد تاريخ المبادرة
✨ ملحوظة : حاليا في مفاوضات بضم عملاء المشاريع الصغيرة و متناهية الصغر للمبادرة بس لحد دلوقتي مفيش أي قرار رسمي طلع
5️⃣ المبادرة هتبدأ تتنفذ امتي ؟
المبادرة مدتها 6 شهور بتبدأ من شهر مارس الحالي وتنتهي في شهر سبتمبر الجاي ⌛
6️⃣ مين البنوك اللي بدأت في تنفيذ القرار ؟
دي قايمة بالبنوك إللي بدأت بتنفيذ المبادرة وفي خلال أيام هتكون كل البنوك فعلت القرار 👌
- بنك مصر البنك الأهلي المصري – NBE
- البنك التجاري الدولي – CIB
- البنك قطر الأهلي الوطني – QNB
- بنك القاهرة
- بنك عوده
- بنك كريدي أجريكول
- بنك أسكندرية
- بنك الاستثمار العربي – AIBK
- بنك التعمير والإسكان
- البنك الأهلي المتحد
- بنك الشركة المصرفية العربية الدولية SAIB
- البنك المصري لتنمية الصادرات
7️⃣ طب لو أنا مش حابب استفيد من المبادرة ؟
كل اللي عليك إنك تتوجه لأقرب فرع لبنكك وبتطلب التوقيع علي عدم المشاركة وانك حابب تسدد بشكل منتظم 💸
بفكرك : إن مواعيد العمل في البنوك اتغيرت وبقت من 9:30 صباحا لحد 1:30 مساءا 💜 كمان متنساش تتبع اجراءات الوقاية وتجنب التجمعات 🙏
أنا سالي : أول مساعد مالي افتراضي خاص ببطاقات الائتمان في مصر
تقدر تسألني أي سؤال عن بطاقات الائتمان ، تفاصيل عن بطاقة بنك معين أو لو تحب أرشحلك أنسب بطاقة تناسب احتياجاتك من اللينك ده
https://m.me/SallyCreditCard
